बारामती (पुणे) : प्रा. विनायक सुभाष लष्कर यांची राष्ट्रीय विमुक्त, भटक्या आणि निम्नभटक्या जाती-जमाती आयोगाच्या तज्ज्ञ समिती सदस्यपदी (कार्यगट) नियुक्ती करण्यात आली आहे. या आयोगात एकूण आठ कार्यगट असून, प्रा.लष्कर हे त्यापैकी तीन गटांचे सक्रिय सदस्य आहेत. या कार्यगटांमध्ये भटक्या-विमुक्त जमातीमधील स्त्रियांचे प्रश्न, या जमाती संदर्भात केंद्र व राज्य पातळीवर अस्तित्वात असणाऱ्या योजनांचा अभ्यास आणि भटक्या-विमुक्तांचे शिक्षण अशा महत्वाच्या विषयांचा समावेश आहे.
प्रा. विनायक लष्कर ‘अनेकांत एज्युकेशन सोसायटी’च्या तुळजाराम चतुरचंद महाविद्यालयातील समाजशास्त्र विभागाचे प्रमुख आहेत. त्यांनी सावित्रीबाई फुले पुणे विद्यापीठातून समाजशास्त्र विषयात पदव्युत्तर शिक्षण घेतले. सध्या ते याच विषयात पीएच. डी. करत आहेत. त्यांनी या विषयामध्ये राष्ट्रीय-आंतरराष्ट्रीय पातळीवरील विविध परिषदांमध्ये शोधनिबंध सादर केले आहेत. सावित्रीबाई फुले पुणे विद्यापीठ व युनिव्हर्सिटी ऑफ मॅसेच्युसेट्स ऍमहर्स्ट, युएसए यांच्या उच्च शिक्षणावर आधारित संयुक्त संशोधन प्रकल्पात त्यांनी काम केले आहे. प्रा. लष्कर भटक्या-विमुक्त जाती-जमातीच्या प्रश्नांवर गेली पंधरा वर्षे काम करत आहेत. या विषयांसंदर्भात त्यांनी विविध नियतकालिके, मासिके आणि पुस्तकांमध्ये सातत्याने लिखाण केले आहे.
प्रा. लष्कर यांच्या नियुक्ती बद्दल अनेकांत एज्युकेशन सोसायटीचे अध्यक्ष अरहतदास शाह सराफ, सचिव जवाहर शहा वाघोलीकर, संस्थेचे सर्व पदाधिकारी, महाविद्यालयाचे प्राचार्य डॉ. चंद्रशेखर मुरुमकर आणि सर्व प्राध्यापक, विद्यार्थ्यांनी त्यांचे अभिनंदन केले आहे.